ذاکر نائیک کو سعودی شہریت مل گئی

خبررساں ادارے تسنیم کے مطابق انتہا پسندی کو فروغ دینے کے الزام میں بھارت میں انتہائی مطلوب ذاکر نائیک کو سعودی عرب کی شہریت مل گئی ہے۔

سعدی عرب کے فرمانروا شاہ سلمان نے خود ذاکر نائیک کو انٹرنیشنل پولیس آرگنائزیشن کے ہاتھوں گرفتار ہونے سے بچانے کے لیے سعودی عرب کی شہریت دی ہے۔

خیال رہے کہ ذاکر نائیک گذشتہ کچھ عرصہ سے سعودی عرب میں ہی مقیم ہے۔

ذاکر نائیک پر منی لانڈرنگ کے بھی الزامات عائد ہیں۔

واضح رہے کہ چند ماہ قبل بھارت کی کابینہ کی کمیٹی برائے سیکیورٹی نے ذاکر نائیک کی متنازع تقاریر کے بعد ان کی غیرسرکاری تنظیم اسلامک ریسرچ فاؤنڈیشن پر 5 سال کی پابندی لگا دی تھی۔

خیال رہے کہ ذاکر نائیک پر پولیس کی جانب سے نوجوانوں کو گمراہ کرنے کے الزام پر پہلے ہی کئی مقدمات بنائے گئے ہیں جب کہ کابینہ کمیٹی برائے سیکیورٹی نے بھی ذاکر نائیک کی تقاریر کو بنیاد بنا کر ان کی تنظیم پر پابندی لگانے کا فیصلہ کیا تھا۔

پچھلے سال جولائی میں بنگلہ دیش میں بھی ذاکر نائیک کے ٹی وی چینل پر دہشت گردوں سے منسلک ہونے اور اسلام کی آڑ میں دہشت گردی کو فروغ دینے کے الزام میں پابندی عائد کردی گئی تھی۔

دھیان رہے کہ ذاکر نائیک کی اشتعال انگیز تقاریر سے متا ثر ہو کر ایک بنگلہ دیشی نوجوان لڑکے نے انتہائی حساس اور سفارتی علاقے میں واقع کیفے پر دیگر 6دہشت گردوں کے ہمراہ دہشت گردانہ حملہ کیا تھا جس میں 22 افراد ہلاک ہو گئے تھے۔ ہلاک ہونے والوں میں زیادہ تر تعداد غیر ملکیوں کی تھی۔

ذاکر نائیک پر برطانیہ اور کینیڈا میں مبینہ طور پر دیگر مذاہب کے خلاف مذہبی منافرت پر مبنی تقاریر کے باعث پابندی عائد ہے۔