برہان وانی کی پہلی برسی، مقبوضہ وادی میں کرفیو، مواصلاتی رابطے منقطع

خبر رساں ادارے تسنیم کے مطابق مقبوضہ کشمیر میں بھارتی فوج سے برسرپیکار حریت پسند رہنما اور حزب المجاہدین کے کمانڈر برہان وانی کی شہادت کو ایک برس گزر گیا ہے۔

برہان وانی کے یوم  شہادت کے موقع پر وادی میں احتجاجی مظاہروں اور ریلیوں کا انعقاد کیا گیا ہے تاہم قابض بھارتی فورسز نے حریت پسند رہنما کی برسی سے کئی روز قبل ہی کشمیری شہریوں پر پابندیاں نافذ کرنا شروع کردیں تھیں۔

حریت رہنماؤں اور نوجوانوں کی گرفتاریوں کا عمل اب تک جاری ہے، گزشتہ روز سے ہی سری نگر میں بھی کرفیو نافذ کر کے شہریوں کو دوسرے علاقوں کی جانب جانے سے روکا جا رہا ہے۔

جبکہ حریت پسند رہنما  برہان وانی کی برس کے موقع پر مقبوضہ کشمیر میں انٹرنیٹ سروس بند کر دی گئی ہے اور پولیس نے انٹرنیٹ کی سہولت فراہم کرنے والے اداروں کو حکم دیا ہے کہ تمام سوشل میڈیا ویب سائٹس کو بلاک کردیا جائے جب کہ نیٹ سروس کے ساتھ ساتھ موبائل فون سروس بھی معطل کرنے کا حکم نامہ جاری کردیا گیا ہے۔

واضح رہے کہ بھارتی پولیس نے برہان مظفر وانی کی شہادت کی پہلی برسی پر جاری کردہ احتجاجی پروگراموں کو ناکام بنانے کے لیے حریت رہنماؤں اور عام کشمیری نوجوانوں کی گرفتاری کا سلسلہ تیز کر دیا ہے اور گزشتہ روز شہید برہان وانی کے والد مظفر احمد وانی کو بھی پولیس اسٹیشن طلب کر کے ڈرایا دھمکایا گیاتھا، تاہم عوام اور حریت پسندوں کا کہنا ہے کہ برسی منائی جائے گی اور احتجاجی ریلی بھی نکالی جائے گی۔