نائیجیریا؛ بوکوحرام نے اغواء شدہ 100 لڑکیوں کو رہا کردیا

خبررساں ادارے تسنیم کے مطابق نائیجیریا کے سرکاری ذرائع کی جانب سے 110 لڑکیوں میں سے 100 کے رہا ہونے کی تصدیق کردی گئی ہے، نائیجیریا کے وزارت اطلاعات کے مطابق رہا ہونے والی تمام لڑکیوں کو ان کے گھروں پر پہنچا دیا گیا ہے، رہائی پانے والی ایک لڑکی کے والد کا کہنا ہے کہ ان لڑکیوں کو شدت پسندوں نے خود دامچی نامی شہر پہنچایا ہے۔

واضح رہے کہ رواں برس فروری میں بوکو حرام نے ریاست یوبے میں ایک اسکول پر حملہ کیا تھا، اس دوران شدت پسند گیارہ سے انیس سال کی درمیانی عمر کی 110 لڑکیوں کو اغوا کرکے اپنے ساتھ لے گئے تھے۔

یاد رہے کہ شدت پسند نائیجیرین تنظیم بوکو حرام نے دو سال قبل اغوا کی گئی 276 لڑکیوں کی ویڈیو جاری کرتے ہوئے حکومت سے لڑکیوں کے عوض اپنے ساتھیوں کی رہائی کا مطالبہ کیا تھا۔

خیال رہے کہ نائیجیریا کے شمال مشرقی علاقے میں بوکوحرام کی فائرنگ سے چوبیس افراد ہلاک ہوگئے تھے، حملہ مقامی رہنما کی موت پر ہونے والے سوگ کی تقریب کے موقع پر کیا گیا تھا۔