کراچی میں شدید گرمی؛ درجہ حرارت 43 ڈگری سے تجاوز کرنےکا امکان


کراچی میں شدید گرمی؛ درجہ حرارت 43 ڈگری سے تجاوز کرنےکا امکان

محکمہ موسمیات کا کہنا ہے کہ شہر قائد میں آج بھی موسم گرم اور خشک رہے گا جبکہ درجہ حرارت 43 ڈگری سے تجاوز کرنے کا امکان ہے۔

خبر رساں ادارے تسنیم نے محکمہ موسمیات کے حوالے سے بتایا ہے کہ سمندری ہوائیں بند ہونے کے باعث کراچی میں آج پارہ 43 ڈگری سینٹی گریڈ سے تجاوز کرنے کا امکان ہے۔

محکمہ موسمیات کا کہنا ہے کہ کراچی میں صبح 8 بجے درجہ حرارت 30 سینٹی گریڈ ریکارڈ کیا گیا جبکہ ہوا میں نمی کا تناسب 17 فیصد ریکارڈ کیا گیا۔

محکمہ موسمیات نے کراچی میں درجہ حرارت بڑھنے کی وجہ سے 23 مئی تک ہیٹ ویو کا خدشہ ظاہر کرتے ہوئے الرٹ جاری کیا ہے۔

محکمہ موسمیات کا کہنا ہے کہ اس دوران جنوب مغربی سمت سے چلنے والی سمندری ہوائیں بند ہونے سے بھی گرمی کی شدت میں اضافہ ہوگا۔

دوسری جانب طبی ماہرین نے شہریوں کو دھوپ میں باہر نکلنے سے گریز کرنے کا مشورہ دیتے ہوئے کہا کہ اگرباہرجانا بھی پڑے تو چھتری استعمال کریں اور سر پر گیلا کپڑا رکھیں۔

خیال رہے کہ محکمہ موسمیات کے مطابق گزشتہ روز بھی کراچی کا درجہ حرارت 44 ڈگری سینٹی گریڈ ریکارڈ کیا گیا تھا۔

اہم ترین پاکستان خبریں
اہم ترین خبریں
خبرنگار افتخاری