تھرکول سے بجلی کی پیداوار شروع

تسنیم خبررساں ادارے کے مطابق، تھرکول انتظامیہ نے منصوبے کی کامیابی پر جشن منایا، جبکہ پیپلزپارٹی کے چیئرمین بلاول بھٹوزرداری اور وزیراعلٰی سندھ نے منصوبے کی کامیابی پر عوام کومبارکباد پیش کی۔

ترجمان نجی کمپنی کے مطابق تھرکول پاورپلانٹ سے تین سوتیس میگا واٹ بجلی نیشنل گرڈ کو فراہم کردی گئی، بجلی کی فراہمی کے تاریخی موقع پر تھرکول انتظامیہ خوشی سے نہال ہوگئے، ملازمین نے کامیابی پر جشن منایا اور مٹھائیاں تقسیم کیں۔

پراجیکٹ کی کامیابی پر وزیراعلٰی سندھ مراد علی شاہ نے ٹوئیٹ میں کہا کہ آج پاکستان کے لیے بڑا دن ہے، سندھ پاکستان کو توانائی، سلامتی کی راہ پر گامزن کررہا ہے، تھر سے پاکستان کے بدلنے کا عمل شروع ہو چکا ہے۔

بلاول بھٹو زرداری نے بھی عوام کو مبارکباد پیش کی، حکومت سندھ اور نجی کمپنیوں کے اشتراک سے یہ منصوبہ دو ہزارگیارہ میں دوسو ارب کی لاگت سے شروع کیا گیا تھا۔

ماہرین کے مطابق تھر کول ایک ایسا پروجیکٹ ہے جس کی وجہ سے تھر میں پایا جانے والا کوئلہ ملک میں توانائی بحران کے حل کا ضامن ہے۔