شاہ محمود قریشی کی چینی ہم منصب سے ملاقات

تسنیم خبررساں ادارے کی رپورٹ کے مطابق پاکستانی وزیرخارجہ شاہ محمود قریشی کابل اور تہران کا دورہ مکمل کرنے کے بعد آج صبح بیجنگ پہنچے جہاں چینی وزارت خارجہ کے اعلیٰ حکام نے ان کا بھرپوراستقبال کیا۔

پاکستان اور افغانستان کے درمیان وفود کی سطح پر مذاکرات ہوئے، پاکستانی وفد کی قیادت شاہ محمود قریشی جبکہ چینی وفد کی قیادت وانگ زی نے کی۔

وزیرخارجہ شاہ محمود قریشی نے چینی ہم منصب وانگ زی سے ملاقات کی جس میں دو طرفہ تعلقات سمیت علاقائی وعالمی امور پر تبادلہ خیال کیا گیا۔

پاکستانی وزیرخارجہ اور چینی ہم منصب نے افغانستان میں قیام امن سے متعلق خصوصی بات چیت کی اور خطے میں امن وروابط کے فروغ کے لیے مشترکہ لائحہ عمل اپنانے کے عزم کا اعادہ کیا۔

شاہ محمود قریشی نے کہا کہ پاک چین دوستی کوعوامی، حکومتی سطح پربھرپورپذیرائی حاصل ہے، سی پیک چینی صدرکے ون بیلٹ ون روڈ ویژن کا عکاس ہے۔

انہوں نے مزید کہا کہ سی پیک پاکستان اورخطے کے لیے وسیع تذویراتی اہمیت کا حامل ہے۔

یاد رہے کہ گزشتہ روز وزیرخارجہ شاہ محمود قریشی نے صدراتی محل میں افغان صدراشرف غنی سے ملاقات کی تھی۔

شاہ محمود قریشی نے افغان پارلیمانی انتخابات کے انعقاد کے لیے نیک تمناؤں کا اظہار کیا تھا جبکہ افغان صدر اشرف غنی نے افغان امن عمل کے لیے بھرپور کردار ادا کرنے پر شکریہ ادا کیا۔

وزیر خارجہ شاہ محمود قریشی کا کہنا تھا کہ افغانستان میں امن واستحکام دونوں ممالک اور خطے کے لیے بہتری کا موجب ہوگا۔

شاہ محمود قریشی کابل کا دورہ مکمل کرنے کے بعد تہران روانہ ہوگئے تھے جہاں انہوں نے ایرانی اعلیٰ حکام سے اہم ملاقاتیں کی تھیں۔