مشترکہ امیدوار پر ووٹنگ سے پہلے کوئی مثبت نتیجہ نکل آئے گا: اعتزاز احسن

تسنیم خبررساں ادارے کی رپورٹ کے مطابق، اسلام آباد میں میڈیا سے گفتگو کرتے ہوئے اعتزاز احسن نے کہا کہ مولانا فضل الرحمن سے معاملات ابھی چل رہے ہیں، مولانا معتبر شخصیت ہیں اور ان کا ایک مقام ہے، ہم کسی بھی صورت ان کی شخصیت پرحرف نہیں لانا چاہتے۔

انہوں نے کہا کہ ہماری کوشش ہے کہ مولانا فضل الرحمن کے حق میں فیصلہ کریں اور وہ پیپلز پارٹی کے امیدوار کے حق میں دستبردار ہوں، ہم اس معاملے پر باہمی رابطے میں ہیں، انشااللہ صدارت کے لیے ووٹنگ سے پہلے کوئی نہ کوئی مثبت نتیجہ نکل آئے گا۔

واضح رہے کہ ملک میں نئے صدر کے انتخاب کے لیے الیکشن 4 ستمبر کو ہوں گے جس کے لیے مشترکہ امیدوار لانے میں اپوزیشن اتحاد ناکام ہوگیا ہے، مسلم لیگ (ن) اور دیگر اپوزیشن جماعتوں نے مولانا فضل الرحمان کو صدارتی امیدوار نامزد کیا ہے جب کہ پیپلزپارٹی نے اعتزاز احسن کو میدان میں اتارا ہے۔

اپوزیشن کے مدمقابل پاکستان تحریک انصاف نے ڈاکٹر عارف علوی کو صدارتی امیدوار نامزد کیا ہے۔